W kooperaciji ze serbskim młodźinskim towarstwom „Pawk“ z.t. předstaji serbski hudźbny kolektiw „Trio a Kumple“ serbsku pop operu „Carpe Noctem – Njeskónčna nóc“.

Młode serbske spěwarki a spěwarjo, wulka band w pisanej wobsadce, dźiwadźelnicy, kaž tež rejowarki a rejowarjo postaraja so zhromadnje wo pisany a multimedialny wječor za přihladowarkow a přihladowarjow wšitkich generacijow. Tu dóstanjeće najaktualniše informacije.

Směće so tuž wjeselić!

 


Terminy

10.09.2021 – 19.30 hodź. !!! WUPŘEDATE !!! ale 21:30 hodź. na reje přeprošujemy

11.09.2021 – 19.30 hodź.

12.09.2021 – 15.30 hodź. (z kofejom a tykancom)

13.09.2021 – 10.00 hodź. (šulerske předstajenje)

*Na wšitkich předstajenjach poskićimy simultanowy přełožk do němčiny.


Što je serbska pop opera?


Serbska pop opera „Carpe noctem – Njeskónčna nóc“ je najnowše hudźbno-dramaturgiske dožiwjenje hudźbneho kolektiwa “Trio a Kumple”. Čerstwe spěwy a klasikarje młodych serbskich hudźbnikow přewodźuja jimacu stawiznu młodeju čłowjekow, kotrajž wobaj na swoje wašnje po nocach za prawym žiwjenjom pytataj. Wjace hač 25 lět po „Pintlašku“ skupiny „Łužica live!“ hotuje so „Trio a Kumple“ pod nawodom Symana Hejduški a Jana Brězana (znataj přez skupinu Sorbian Art Trio) na hudźbno-dźiwadłowy wjeršk swojeje generacije. Při tym podpěruja jich młode spěwarki Thea a Greta Ćórlichec, Sophie Hejduškec a Helena Hejduškec kaž tež młodaj spěwarjej Józef Brězan a Józef Donat ze swójskimi kompozicijemi. Na jewišću zwołataj młodaj talentowanaj dźiwadźelnikaj hłownej wosobje do žiwjenja. Jeju nawjeduje jako režiser Ištvan Kobjela, kiž je dźiwadźelnik a hudźbnik na Němsko-serbskim ludowym dźiwadle w Budyšinje. Libreto za pop-operu je awtor Měrćin Wjenk napisał. Nimo hudźbnikow a dźiwadźelnikow měšani rejowarjo wobraz žiweho a młodeho serbskeho wuměłstwa z načasnymi choreografijemi wudospołnjeja. Hudźba, dźiwadło a reje, kajkež je hišće nichtó widźał njeje a k tomu dźensniše multimedialne wuměłstwo su přičina, zo wone dny mjez 10. a 13. septembrom w Chróšćanskej wjacezaměrowej hali „Jednota“ nichtó njezabudźe. Pop-operu „Carpe noctem – Njeskónčna nóc“ podpěruja serbske młodźinske towarstwo „Pawk“ z.t., Załožba za serbski lud a Sakski fonds za strukturnu změnu „Čiń sobu!“.

Wo čim so jedna?


Carpe diem – łaćonske hesło, po kotrymž měli dźeń wužić, přewodźuje drje wjetšinu z nas po wšědnym dnju. Rano zahe chwatamy z borła won do dźěła a žiwjenja a wječor so zaso sprócni do njeho lehnjemy. Tola nic wšitcy. Někotři maja wšědny dźeń syći a pytaja za swobodnym a prawym žiwjenjom po nocach. A druzy čuja so porno tomu njesmilneho dóńta dla z towaršnosće wustorčeni a na nóc wjazani, žedźa pak so za kusk normality. Što pak, hdyž tajkeju kuzło nocy připadnje hromadźe wjedźe a w běhu wonych potajnych a wabjacych, ale tež zymnych a prózdnych hodźinach do schadźenja słónca wjace njepušći? Sćěhuj młodu žonu a młodeho muža, kak wonaj kóždy na swoje wašnje a tola zhromadnje cyle po łaćonskim Carpe noctem tutu nóc wužitaj. Dožiw z nimaj njezapomnitu a njeskónčnu nóc.

Serbski hudźbny kolektiw „Trio a Kumple“

…je serbski hudźbny kolektiw (Musiker-Kollektiv) wokoło skupiny Sorbian Art Trio, to rěka nimo tutych třoch bjez kruteje wobsadki, wotwisajo wot projekta, kiž so runje spřihotuje. Cil su wšelake hudźbne projekty, w kotrymž dóstanu wosebje nowe talenty móžnosć so prezentować. Jedyn tajki běše koncert kónc lěta 2017 w Radworju, hdźež prezentowachu dorostowe hudźbnicy a hudźbniki zhromadnje z profijemi serbske kaž tež internacionalne hity. Za lěto 2021 je mjez druhim planowana serbska pop opera z kompozicijemi młodych serbskich songwriterkow a songwriterow w šaće hudźbneho dźiwadła.

Serbske młodźinske towarstwo „Pawk“ z. t.

…załoži so w lěće 1994 w Budyšinje. Wot 1995 zwjazuje Pawk jako sobustaw MENS – Młodźiny europskich narodnych skupin tež mjezynarodne kontakty. Towarstwo wobdźěli so na seminarach a je tež sam organizuje. Kóžde lěto přewjedźe a organizuje tójšto projektow kaž PowerSerb, wuměnu na Roskilde festiwalu, Nócny wolejbul abo Studenća pomhaja šulerjam, zhromadnje ze Serbskim gymnazijom. Cil je, młodostnym rěčne rumy stworić a jich identitu skrućić. Dale podpěra Pawk tež hudźbne abo kulturne projektowe ideje w Serbach a je sobu přesadźi.